Qemal Kokalari (1891-1968)

Qemal Kokalari 1891-1968 ishte djali i dytë i Tahsin Kokalarit dhe Qibro Kallajxhiut, vëllai i Fuatit, Mikos, Shaqirit, Hazbiut, Nebies dhe Haxhesë. Lindi dhe kaloi pjesën më të madhe të jetës në Gjirokastër.
Pas përfundimit të Zosime-së së Janinës zotëronte me të folur dhe të shkruar gjuhët turqisht, frëngjisht, arabisht, dhe greqisht. Në vitet e para pas shpalljes së pavarësisë emigroi për tetë vjet në Amerikë, ku drejtonte biznesin e familjes në eksportimin e produkteve blektorale. Aty përvetësoi edhe komunikimin në gjuhën angleze.

U kthye në Shqipëri në fillim të viteve '20, pas 8 viteve në emigracion dhe u martua me vajzën e Shuqiri Kallapodhit nga Delvina.

Për shkak se shkollimin e kishte bërë para se të përhapej shkrimi shqip, dhe një kohë të gjatë e kishte kaluar në emigracion, Qemali nuk kishte mësuar të shkruante shqip, prandaj për ta plotësuar këtë mangësi, mori mësime private nga mësuesi i nderuar dhe miku i tij Thoma Papapano.

Pas kthimit në Shqipëri, Qemali u punësua në administratën e Bashkisë Gjirokastër. Ai u zgjodh disa herë rrjesht si Sekretar i kësaj Bashkie, por njëkohësisht edhe administrator i mjeteve monetare. Gjithashtu u tregua aktiv në jetën publike duke qënë një prej anëtarëve të Shoqërisë Drita të themeluar nga intelektualët e kohës në Gjirokastër.

Qemali la katër djem Fadilin, Tomorin, Nuriun dhe Tajarin. Secili prej tyre u dallua për përkushtim dhe arritje të suksesshme në profesion, megjithëse u privuan të zgjidhnin profesionet që dëshironin.