Kisha e Shën Mitrit Në Poliçan të Pogonit, Viti 1526

Kisha e "Shën Mitrit" gjendet në fshatin Poliçan të Pogonit. Kisha përbëhet nga naosi dhe narteksi në anën perëndimore. Naosi ka përmasa të brendshme 4.60x2.60 dhe është i mbuluar me çati druri pa tavan. Apsida e kishës është në formë gjysmërrethore. Muratura është me gurë të lidhur me llaç gëlqereje. Çatia e kishës është dyujëse dhe është e mbuluar me rrasa guri[1].

Mbi portën perëndimore të kishës gjendet një mbishkrim, i cili na bën me dije se kisha është rindërtuar dhe pikturuar në vitin 1526: + Ανεκενίστι καί ανιστορίθη ό θείος καί πάνσεπτος / ναός τού αγίου μεγαλομάρτυρος Δημητρίου του μυροβλίτου, / διά συνδρομής κόπου τε κ(αί) εξόδου παπά Κυριάκη κ(αί) τού αδελφου αυτου / ....πουλου, κ(αί) γεωργίου του παπά Βασιλείου καί Γεωργιου τού / ....ιερατευοντος τού θεοφυλεστάτου επισκό / (που Δρυνουπολεος Κυρου, Σιμεών εν ετοι Ζ Λ Δ (7034=1526) (κυκλος η) λίου ΙΔ απριλίω κ. “U përtëri dhe u pikturua ky tempull hyjnor dhe i gjithnderuar i dëshmorit të madh të shën Mitrit Morovlit, me kontributin, përpjekjet dhe shpenzimet e at Qiriakut dhe të vëllait të tij Gjeorgopullit dhe të Gjergjit të Papa Vasilit dhe Gjergjit të Logothetit, dhe në kohën e peshkopatit të peshkopit të Drinopojës, shumë perëndidashës, zotit Simeon, në vitin 7034 (=1526) cikli i diellit 14, prill 20”[2].

Në kishën e "Shën Mitrit" pikturat murale ruhen në gjendje të mirë. Mbi mbishkrimin gjenden dy skena "Fjetja e Shën Mërisë" dhe "Hyrja e Krishtit në Jeruzalem", e cila është dëmtuar. Në murin verior kemi skenat "Kryqëzimi i Krishtit", "Zbritja e Krishtit nga Kryqi", "Guri i varrit" dhe "Ngjallja e Krishtit". Në apsidën e altarit paraqitet skena e "Shestjes", ndërsa në murin e anës jugore duke filluar nga hyrja e kishës paraqiten skena e "Shpërfytyrimit të Krishtit", "Ipapandia" dhe "Lindja e Krishtit". Nën skenën e "Ipapandisë" gjendet "Deisis", ndërsa nën skenën e "Lindjes së Krishtit" paraqiten Shën Spiridhoni dhe Shën Elefteri[3].

Në anën e jashtme të derës së kishës së Shën Mitrit është shkruar: (Το στερέωμα) των σοί πεποιθώτον στερ(έσων κύριε) τήν εκκλη-σίαν τήν εκτυσατο (τώ τιμίω σου αίματι) έτους, Ζ Μ ΣΤ (7046=1538). “Mbështetja e atyre që shpresojnë tek ty, forco o zot kishës që e ndërtove me gjakun tënd të çmuar viti 7046 (=1538)”[4].

Në këtë kishë janë pikturuar rreth 32 afreske. Përsa i përket vendosjes së tyre i paraqet në mbrojten e temës së doktoraturës Jorgos Jakumis: "Analipsi", "Shën Lefteri", "Nëna e Perëndisë", "Krishti në fron", "Joan Pararendësi", "Kryeengjëlli Mihail", "Shën Kostandini", "Shën Elena", "Shën Varvara", "Shën Gjergji", "Shën Dhimitri", "Zbritja në had", "Kryqëzimi", "Fjetja e Hyjlindëses", "Emanueli", "Ngjallja e Llazarit", "Shpërfytyrimi", "Shën Nikita", "Ipapandia", "Lindja e Krishtit" etj[5].