Kisha e “Shën Anës” Derviçan, Gjirokastër, Shek. XVI

Kisha e Shën Anës gjendet në një pllajë të lartë të fshatit Derviçan, ku ruhen rrënojat e fshatit të vjetër [1] . Mendohet të jetë ndërtuar në shekullin XVI. Hyrja për në kishë bëhet në anën perëndimore. Kisha është ndërtuar në një terren të pjerrët shkëmbor. Poshtë naosit të kishës është qimitiri, i cili ka formë katrore. Muratura e kishës është me gurë gëlqerorë me vendosje të rregullt, të lidhur me llaç gëlqereje [2] .

Kisha ka përmasa të brendshme 4.50x2.90 metra. Është e mbuluar me çati dyujëse. Ajo k atrajtë salle, mbuluar me qemer cilindrik. Nëpër muret gjatësore dalin pilastra, të cilat lidhen ndërmjet tyre me harqe. Harqet tërthore dhe gjatësore krijojnë nike në murin verior dhe atë jugor. Mbi portën perëndimore dhe në apsidën e kishës ka dritare të vogla. Kisha shëmbëllen me një vëllim të gurtë prizmatik, të mbuluar me çati dyujëse. Lartësia e kishës është shumë e madhe për shkak të terrenit të pjerrët. Kisha nuk ka asnjë element zbukurimor, me përjashtim të nikes mbi portë dhe dy dritareve që gjenden mbi të, të cilat janë me harqe tullash. Altari ndahet me një ikonostas prej muri. Duke u nisur nga tiparet tipologjike, kisha daton në shek. XVI [3] .