Në përkujtim të 100-vjetorit të lindjes së mjeshtrit të rrobaqepësisë, qytetarit të nderuar, z. Ahmet Xhafer Demiri (1925 – 1993)

Ahmet Xhafer Demiri, i lindur më 6 janar 1925, kujtohet nga shumë qytetarë të Elbasanit, si dhe nga brezi ynë, si një nga rrobaqepësit më të njohur e më të vjetër të qytetit. Rrugëtimi i tij në mjeshtërinë e rrobaqepësit filloi në vitin 1941, kur ende ishte çirak.

Jetimi që në fëmijëri, ai u detyrua të fillonte punë herët për të mbështetur familjen. Me përkushtim e durim, mësoi zanatin si çirak dhe më pas hapi një dyqan privat në Bezistan, përballë çezmës, së bashku me të ëmën. Përveç punës së tij, ai kontribuoi në arsimimin e dy motrave dhe vëllait të tij, Mustafa Demirit, botanistit që themeloi Kopshtin Botanik në Tiranë.

Pas përfundimit të Luftës së Dytë Botërore, në vitin 1944, Ahmeti u bë pjesë e kooperativës së rrobaqepësve të qytetit, e cila u krijua pas sekuestrimit të makinave qepëse private, përfshirë edhe atë të familjes së tij. Kjo kooperativë bashkoi shumë mjeshtër të zanatit dhe hapi një dyqan të qepjeve në seri pranë parkut “Rinia”.

Në vitet në vijim, ai punoi në dyqanet e shtetit, përfshirë “Sallonin e Modës” pranë Bustit të Kristoforidhit. Për shkak të perfeksionit në zanatin e tij, Ahmeti u nderua me titullin “Mjeshtër” dhe u angazhua gjithmonë në pozita përgjegjëse.

Ahmeti kishte një pasion të veçantë për bletarinë, pasion që e ushtronte me shumë kënaqësi gjatë kohës së lirë. Përkushtimi i tij ndaj kësaj veprimtarie çoi në arritje të rëndësishme, si nxjerrja e qumështit të bletës në vitin 1967.

Në vitin 1977, gjatë zhvillimit të Kongresit të Rinisë në Kombinatin Metalurgjik, u inaugurua edhe Kino Metalurgu. Për ndërtimin dhe nxjerrjen në pah të kësaj godine, pati shumë prishje shtëpiash, përfshirë edhe shtëpinë e Ahmetit. Pas kësaj, ai dhe familja e tij u vendosën në një apartament në pallat, gjë që ndikoi ndjeshëm në jetën e tij. Ky ndryshim e largoi nga përkushtimi ndaj bletarisë, një pasion që e kishte ushtruar me dashuri dhe përkushtim për vite të tëra.

Ahmeti ndërroi jetë në vitin 1993, duke lënë pas  dy djem dhe dy vajza, të cilët janë krenaria e familjes DEMIRI.

Fotografitë janë marrë nga arkivi i familjes Demiri, si një kujtim i vyer i  një qytetari të nderuar të Elbasanit.

Kujtimi i Ahmet Xhafer Demirit do të mbetet gjithmonë i gjallë në zemrat e atyre që e njohën dhe që u frymëzuan nga përkushtimi dhe puna e tij.