Ali Molloholli

Dr. Ali Molloholli lindi në qytetin e Elbasanit më 27 janar të vitit 1927. Shkollën fillore dhe atë të mesme “Normalen” i përfundoi në qytetin e tij të lindjes me rezultate të shkëlqyera. Për këtë arsye, studimet e larta i vazhdoi jashtë vendit, në Pragë të Çekosllovakisë, në degën e mjekësisë nga viti 1947 deri në vitin 1953. Atje përfundoi shkollën e lartë dhe u diplomua si Doktor në mjekësinë e përgjithshme – Medicinae - Universal Doktoris [M.U.D].

Pasi mbaroi studimet e larta, Dr. Ali Molloholli rikthehet në Shqipëri, ku nga shkurti i vitit 1954 deri në vitin 1955 punoi si mjek epidemiolog pranë Qendrës Sanitare Epidemiologjike të Tiranës [Q.S.E]. Nga viti 1956 deri në vitin 1959, vazhdoi të punonte si mjek bakteriolog pranë Laboratorit Qendror Bakteriologjik në Tiranë.

Nga viti 1959 deri në vitin 1975, Dr. Ali Molloholli ka punuar me përkushtim të lartë profesional pranë Institutit Kërkimor të Higjenës dhe Epidemiologjisë [I.H.E], periudhë kjo që përbën një etapë të rëndësishme në kontributin e tij në fushën e studimeve mjekësore. Gjatë kësaj kohe, ai ka mbajtur pozicione drejtuese në I.H.E si shef sektori, zëvendësdrejtor dhe shef reparti, duke u përfshirë intensivisht në procesin e kërkimit shkencor dhe duke e drejtuar me sukses këtë qendër studimore.

Përveç pasionit dhe përkushtimit profesional, sukseset e Dr. Ali Mollohollit ishin rezultat i kualifikimeve dhe specializimeve të shumta jashtë vendit, duke ndikuar dukshëm në përmirësimin e performancës së tij profesionale.

Për një periudhë afro 5-vjeçare, Dr. Ali Molloholli u shkëput nga I.H.E dhe punoi në terren, në ndihmë të zonave të thella të vendit, ku nevojat për mjekë ishin më emergjente. Nga korriku i vitit 1975 deri në dhjetor të vitit 1980, ai punoi si mjek, fillimisht pranë Drejtorisë së Higjienës në Shkodër dhe më pas në Elbasan. Gjatë kësaj periudhe, ai u përqendrua në vaksinimin e popullsisë së këtyre zonave, veçanërisht të fëmijëve, dhe me humanizmin që e karakterizonte, ai vajti personalisht në zonat më të thella malore të qarkut të Shkodrës, ku depërtimi ishte tepër i vështirë në kushtet e atëhershme.

Pas kësaj përvoje, ai u rikthye përsëri në Institutin Kërkimor të Higjenës në vitin 1981, ku vazhdoi veprimtarinë e tij deri në vitin 1988, kur doli në pension.

Aktiviteti i punës:

• Dr. Ali Molloholli është një nga themeluesit kryesorë të Institutit Kërkimor të Higjenës dhe Epidemiologjisë në vitin 1956.
• Ka ngritur shërbimin e bakteriologjisë së tuberkulozit në vend në vitin 1957.
• Ka realizuar prodhimin e vaksinës BCG të lëngët në vend në vitin 1966.
• Ka realizuar liofilizimin e vaksinës BCG në vitin 1979.
• Ka ngritur repartin e bakteriologjisë për infeksionet e ajrit në vitin 1956, duke vënë për herë të parë në praktikë diagnostikimin bakteriologjik në kulturë.

Specializimet e kryera:

• Në vitet 1955-1956, Dr. Ali Molloholli u specializua për një periudhë njëvjeçare për Bakteriologji në Pragë, Çekosllovaki.
• Në vitet 1964-1965, u specializua për prodhimin e vaksinës BCG në Pragë.
• Në vitin 1965, kreu një specializim 3-mujor për prodhimin dhe liofilizimin e vaksinës BCG në Institutin Pasteur në Paris, Francë.

Veprat shkencore dhe dekorimet:

• Dr. Ali Molloholli ka botuar mbi 25 punime shkencore në shtypin mjekësor të vendit dhe në atë të huaj.
• Ka mbajtur referate dhe kumtesa në forume shkencore kombëtare dhe ndërkombëtare.

Titujt shkencorë dhe dekorimet:

• Në vitin 1982, ka mbrojtur disertacionin për shkallën e parë të kualifikimit: Kandidat i Shkencave Mjekësore, me temën “Vaksina dhe vaksinimi me BCG”.
• Në vitin 1996, ka marrë gradën shkencore në mjekësi “Doktor i Shkencave”.

Në vitin 2002, ai mori titullin shkencor akademik “Profesor i Asociuar” dhe ka qenë pedagog i jashtëm në Fakultetin e Mjekësisë në Tiranë