Florenc dhe Shane Shllaku
- Përshkrim
- Çifti Shllaku - Një jetë në skenë
- Autori
- ADE
- Kontribuesi
- Z. Dhimitër Topuzi
- Jetëshkrimi
-
Para disa kohësh, me ratin e 60 vjetorit të saj, aktorja e Teatrit dhe Estradës Shane Shllaku ka prezantuar një album të sajin fotografik me titull ”Një jetë në skenë”. Me të vërtetë është një album mjaft cilësor dhe emocionues, ku me anë të fotove paraqitet e gjithë rruga artistike e çiftit Shllaku. Po në këtë shkrim nuk do të merremi me analizën e albumit, por me diçka, që më bëri të emocionohem e të mendoj pse është harruar bashkëshorti i saj, aktori i talentuar Florenc Shllaku ? Kur shikon fotot e Florit përballesh me buzëqeshjen karakteristike, me finesën e tij, me thjeshtësinë dhe dashurinë për kolegët, shokët e miqtë. Flori rrjedh nga një familje Shkodrane mjaft të dëgjuar dhe me peshë në fushën e artit e letërsisë, jo vetëm në Shkodër por dhe jashtë saj. Florenci erdhi në Estradën Profesioniste të Elbasanit në vitin 1962 dhe u largue prej saj në 1969, duhet thënë se e larguen për arsye biografie. Mëkat por realitet. Megjithëse një karierë të pakët artistike rreth 7 vjet, ai la një pasuri artistike me rolet e tij, në galerinë e tipave e karaktereve që krijuan të gjithë aktorët e humorit në Estradën tonë.
Flori luajti me një plejadë aktorësh të shquar si Hysen Biza, Ferit Gjevori, Agron Graceni, Mahmut Kurti, Bukuri Xhoxhi, Evelina Haka, Llambi Burgjia. Të gjithë bashkë me orkestrën e mrekullueshme të Estradës mbushnin në atë kohë jo vetëm sallën e Teatrove dhe Estradave nga jugu deri në veri të Shqipërisë. Flori ishte aktor mjaft kërkues ndaj vetes, edhe n.q.s. roli nuk kishte humorin e duhur, ai do të gjente detajin që do t’i jepte humorin e duhur karakterit të krijuar prej tij. Në një skeç ku ai luante një personazh politik të kohës, për t’a bërë atë figurë sa më qesharake, ai vendosi brenda gojës dy kokrra arre. U krijue një fryrje faqe që krijonte humor mjaft të këndshëm në skenë. Luante me pasion dhe i bënte “yzmetin” si atij gansterit apo burokratit pa skrupull ashtu dhe atij puntori serioz, skematik të kohës. Talenti i tij ishte i shumtë, qe një valltar që kërcente bukur vallen popullore, por edhe atë klasike. I paharruar do të mbetet interpretimi i tij dhe i së motrës Nina, në pjesën mjaft të njohur klasike “Nën diellin e jugut” duke krijuar një duet mjaft simpatik. Flori bëri mjaft mirë dhe me mjeshtëri rolin e prestidigjatorit në Estradë. Për këtë qëllim pati kryer një kurs kombëtar në Durrës. Aq mirë e përvetsoi këtë gjini artistike sa edhe kur u ftua në një premierë të Estradës “Variete 95” pas 25 vjetësh si prestidigjator ai bëri me mjaft mjeshtëri numra të ndryshëm, që ishin të këndshëm e shumë zbavitës. Edhe në teatër luajti disa role , ku më i mirë mbetet roli i Ndre Kaltonës te drama “Shtatë Shaljanët”. Shpirti i tij krijues prej artisti, punëtor i zoti dhe i aftë, bëri që edhe në ndërmarrje të tjera ku punoi të shquhesh për novacione. Kujtojmë që gjatë viteve 1988-1989 me iniciativën e tij hapi i pari repartin e bizhuterive e zbukurimeve artistike. Megjithë zig-zaket e jetës dhe tani Flori është njeri mjaft optimist. Një meritë në këtë optimizëm të tij ka bashkëshortja Shania, që i qëndroi gjithnjë në krah. Bashkë në skenë, bashkë në jetë, bashkë në të mira e të këqia. Shania, veprimtarinë më të madhe artistike e ka në teatër ku luajti gati 25 vjet, e duke patur në fondin e saj mbi 30 role, që nga fshatarja naive, vajzat çapkëne dhe të zgjuara, ku përmendin rolin e saj te komedia “Shërbëtori i dy zotërinjve” , drama “Vëllezërit” e deri tek plakat llafazane. Edhe ne estradë kontributi i saj ka qenë mjaft i madh, megjithëse punoi pak në Estradë, në vitet 1986 – 1991. Ajo luajti në 8 premiera me rreth 20 role. Shquhet për elegancën dhe shkathtësinë e saj aktoreske. Ka disa figura artistike si “Shoqja e beut”, apo vajzën çapkëne te skeçi “Vezët”, si dhe përgjegjësen tek komedia muzikore “Festë në brigadë”, e shumë e shumë të tjera. Trashëgimia artistike e këtij çifti simpatik është mishëruar tek dy fëmijët e tyre Mikeli dhe Aldo, të dy jetojnë jashtë shtetit, i pari piktor ndërsa i dyti, Aldo, punon në studiot e Hollivudit me muzikën e filmave. Në këtë 55 vjetor të Estradës i urojmë çiftit Shllaku : Jetë të gjatë, shëndet të plotë. - Publisher
- ADE
Linked resources
Etiketa të reja
Part of Florenc dhe Shane Shllaku
Renditja: 160 (294 shikime)
ADE, “Florenc dhe Shane Shllaku”, ADE, Arkiva Digjitale Shqiptare, accessed 30 prill 2026, https://adsh.al/s/adsh/item/13913
Komentoni
No comment yet! Be the first to add one!