Ylber Hysen Dakli (1930-2005)
Invalid data for media #14166.
- Përshkrim
- Ylber Hysen Dakli (1930-2005)
- Emri
- Ylber
- Mbiemri
- Dakli
- Data e lindjes
- 1930
- Data e vdekjes
- 2005
- Autori
- E. Dakli
- Kontribuesi
- ADE
- Jetëshkrimi
-
Ylber Dakli u lind më 23 Shtator 1930 në qytetin e Elbasanit. Ishte fëmija i gjashtë i Hysen dhe Rukie Daklit. I lindur në një familje atdhetare dhe përparimtare që në qëndrimin e saj heshtur nuk pajtohej me regjimin e ri që erdhi në fuqi pas luftës së dytë dhe për këtë arsye nuk shihej me sy të mirë nga pushteti , gjatë rinisë së tij e ndjeu mbi shpatulla pasojat e persekutimit nga pushteti diktatorial komunist.
Në vitin 1948 Ylberit iu mohua e drejta e diplomimit si normalist në Elbasan, për rrjedhojë ai e kreu diplomën në Berat. Në pamundësi për të vazhduar më tej studimet Ylberi ndoqi një kurs për gjeometër në Tiranë në vitin 1949.
Pas diplomimit nisi karieren si teknik ndërtimi në Gosë e më pas në Bashkinë e Kavajës 1950 për ta vazhduar atë si teknik në rrugën automobilistike Memalias-Tepelenë në vitet 1953-1954. Në vitin 1954 u transferua në Elbasan, në ndërmarrjen e ujësjellësit, ku për mbi 50 vjet punoi me pasion e devotshmëri, duke zotëruar deri në perfeksion tërë kompleksitetin e rrjetit të tij për qytetin e Elbasanit.
Kontributi i tij u shtri jo vetëm brenda qytetit ku drejtoi punimet për shtrirjen e tubacioneve që do furnizonin me ujë të pijshëm qytetin e Elbasanit, Kombinatin e Drurit, Kombinatin Metalurgjik dhe Fabrikën e Çimentos.
Ai dha gjithashtu një kontribut të paçmuar edhe në shtrirjen e ujësjellësit në fshatrat Qarkut të Elbasanit : hartoi projekte dhe drejtoi punime për ndërtimin e ujësjellsave në zonën e Dumresë dhe të Sulovës, në fshatrat e Labinotit, Funarit dhe të Shmilit gjatë viteve 1970- 1980, ndoqi me pasion të veçantë problematiken e vend-burimeve të zonave të Shpatit, të Librazhdit e të Funarit, duke përgatitur projekt-ide për stacione pompimi dhe rrjete tubacionesh për furnizim me ujë si dhe ndërtimin e Hidrocentraleve të vegjël që do të plotësonin nevojat lokale për energji elektrike. Punoi gjithnjë me përkushtim për standarte të larta të cilësisë e pastërtisë së ujit të pijshëm të rridhte në shtëpitë e qytetarëve elbasanas.
Pikërisht kjo përvojë e gjatë dhe kontributi në ndërmarrjen e ujësjellit do të bënte që Ylber Dakli deri në fund të jetës së tij të njihej nga të gjithë si “ Inxhinieri i ujësjellësit” . Nuk ka fshat të qarkut të Elbasanit, ku nuk shkeli këmba e e “Inxhinierit te Ujësjellësit” i cili punoi gjithë jetën, pa u lodhur, pa njohur orare të ditës e natës duke rrezikuar disa herë edhe jetën siç qe rasti i vitit 1974 të shpërthimit të një pusete nga prezenca e gazit solvent, si pasojë e së cilit Ylberi pësoi djegje të gradës së dytë.
Puna e përkushtuar, ndershmëria në punë, natyra e tij fisnike e heshtur e fjalëpakë, aftësitë profesionale të paqortueshme, bënë që Ylber Dakli t’i mbijetonte luftës së klasave dhe të ndjehej i vlerësuar jo vetëm nga bashkëqytetarët dhe kolegët po edhe nga administrata e Ujësjellësit për të cilin punoi. Në vitet e fundit të karrierës së tij u dekorua me Urdhërin e Punës së klasës së dytë.
Pas daljes në pension,Ylberi Dakli vazhdoi të punonte si konsulent në disa projekte ujësjellësish. Duke qenë një njohës shumë i mirë i rrjetit të ujësjellës-kanalizime për qytetin e Elbasanit, Ylber Dakli u përfshi edhe në projektin e hartuar nga specialistët e Ndërrmarrjes së Ujësjellësit të Berlinit për rinovimin e ujësjellës- kanalizime të qytetit të Elbasanit. Në këtë projekt të rëndësishëm me vlerë 44 milion DM, Ylberi ofroi me modesti eksperiencën e tij gjysmë shekullore duke mbrojtur me fanatizëm interesat e bashkëqytetarëve të tij.
Mbas viteve 2000 Ylberi filloi të punojë edhe për historikun e ujësjellësit të Elbasanit e me gjërë, duke u përpjekur që eksperiencën e brezit të tij ta linte të dokumentuar për gjeneratën e re të ndërmarrjes ujësjellës kanalizime në trevën e Elbasanit. Për fat të keq, dorëshkrimin me skica e draft-projekte nuk arriti ta përfundojë e ta botojë.
Me 18 Maj 2005, mbas një sëmundje të rëndë e cila u përkeqësua nga plaga e rëndë që mori pas humbjes së jetës vetëm dy muaj më parë të djalit të vetëm, inxhinierit të talentuar 33 vjecar Sokolit, Ylber Dakli ndërroi jetë.
Ylber Dakli qe nga ata njerëz duar artë e fjalëpak, specialist i aftë që edhe pasi ikin lënë pas për ata që do vijnë shembullin e tyre qytetar. Po në të vërtetë ai la pas më shumë se kaq : Në çdo pikë ujë që rrjedh në shtëpitë e qytetarëve elbasanas do jetë edhe mendja dhe dora e mjeshtrit të ujërave, Ylber Dakli, njeriut që titullin e inxhinierit e fitoi nga bashkëqytetarët e tij me punë, përkushtim e pasion.
Etiketa të reja
Part of Ylber Hysen Dakli (1930-2005)
Renditja: 5257 (1 shikime)
E. Dakli, “Ylber Hysen Dakli (1930-2005)”, Arkiva Digjitale Shqiptare, accessed 26 maj 2026, https://adsh.al/s/adsh/item/14165
Komentoni
No comment yet! Be the first to add one!