Abdyl Kajanaku

Abdyl Kajanaku “Mësuesi i Merituar” nga Normalja e Elbasanit në Institutin Zhan Zhak Ruso të Zvicrës

Në historinë e arsimit elbasanas, Abdyl Kajanaku është njeri nga ata “Mësues të Merituar” që ishte dhe mbeti një punëtor i devotshëm e religjioz i shkollës elbasanase dhe asaj kombëtare. Ai mertion vlerësimin jo vetëm sepse së bashku me kolegët hodhën themelet e shkollës shqipe, por mbi të gjitha, shpirti i tyre atdhetar e demokrat dha dritë për alfabetin dhe shkrimin e shqipes së sotme. 
Abdyl Kajanaku u lind në Elbasan në një familje qytetare, ku në vendlindjen e tij Kongresi Arsimor vendosi çeljen e shkollës Normale, e para shkollë e mesme kombëtare, në të cilën profesori i nderuar lidhi jetën e tij. Si nxënës e respektoi këtë shkollë me rezultatet e tij, ndërsa më pas si mësues në këtë shkollë, me punën e tij e nderoi. 
Në korrik 1928, ai mbaroi studimet në Normale më nota të shkëlqyera dhe fillon karrierën e mësuesisë në shtator 1928 fillimisht në Durrës e më pas kthehet në Elbasan. 
Në vitin 1935 Abdyl Kajanaku fillon studimet e  larta në Institutin Zhan Zhak Ruso për psikologji e pedagogji në Gjenevë të Zvicrës, shkollë kjo e një niveli shumë të lartë për kohën në mbarë Europën. Pas përfundimit të studimeve, kur kthehet në Shqipëri, Ministria e Arsimit e emëron Inspektor të lartë pranë kësaj Ministrie. Punon këtu deri në vitin 1941, pastaj fillon punë në Gjirokastër dhe më pas në vitin 1943-1947 në shkollën Normale. Më pas do të jetë për disa vite në Korçë dhe në Shkodër. Në vitin 1960 deri më 1975 do të jetë në Normalen e Elbasanit.
Kudo ku punoi, në shkolla të mesme apo në Institutin e Lartë Pedagogjik, do të shquhet për profesionalizëm, për pasion e përkushtim në detyrë, duke përcjellë për gjithë këto vite një emër të nderuar të mësuesit, metodistit e didaktit dhe mbi të gjitha të qytetarit shembullor. 
Është udhëheqësi kryesor i pedagogjisë praktike, njeh mirë problemet e shkollës fillore e të mesme, është iniciues i futjes së metodave të reja në shkollën Ushtrimore. Kudo që punoi në Tiranë, Durrës, Gjirokastër, Korçë, Shkodër e Elbasan, përcolli emrin e mësuesit dhe qytetarit elbasanas të nderuar për breza të tërë.
Abdyl Kajanaku mbetet një figurë e respektuar edhe në Arsimin e Lartë. Për autoritetin pedagogjik të konsiderueshëm që kishte, ai mbajti leksionin e pare në përurimin e Institutit të Lartë Pedagogjik në Shkodër, më 1 shtator 1957. Po kështu pas shumë viteve, në Elbasan me rastin e çeljes së Institutit të Lartë Pedagogjik, mbajti leksionin e parë. 
Është nderuar me titullin “Mësues i Merituar”.