Dr. Kolë Fot Papajani (1925-2003)

  Historia e mjekësisë në Elbasan është shkruar me punën e mjekëve që kanë dhënë kontribute të rëndësishme me specialitetet e tyre. Ata ishin kryesisht elbasanas, por edhe të ardhur nga qytete të tjera. Secili nga ata ka vendin dhe kontributin e tij në shërbim të nejrëzve. Një i tillë ka qenë edhe  doktor Kol Papajani. 
  Ai ka lindur më 20 gusht1925 në Elbasan. Shkollën fillore e kreu në qytetin e lindjes, më pas në vitin 1935 ndjek Liceun Francez në Korçë (dega klasike). Në vitin 1939 me mbylljen e Liceut për shkak të fillimit të luftës ndjek gjimnazin “Qemal Stafa”në Tiranë ku mbaron me rezultate “shkëlqyeshëm”në vitin 1944.
  Në vitin 1945 fillon studimet në Fakultetin e Mjekësisë në Zagreb, ku qëndron deri në vitin 1948 (shkak prishja e marrëdhënieve me Jugosllavinë). Nga viti 1948- 1950 vazhdon studimet në Sofie të Bullgarisë, nga ku e kthejnë pa mbaruar studimet si pinjoll i një familjeje borgjeze.
Duhet theksuar se në çdo nivel të arsimimit ka dalë me rezultate të shkëlqyera. 
  Në vitet 1950- 1952 kryen shërbimin ushtarak në Kukës, shërbim gjatë të cilit nuk iu dha asnjëherë leje të vinte në shtëpi. Punon si ndihmësmjek në Elbasan, më pas një vit në Memaliaj dhe një vit në Bulqizë.
Rifillon studimet në vitin 1955 në Fakultetin e Mjekësisë në Tiranë, ku dhe i përfundon në vitin 1957.
  Nga viti 1957 deri 1973 punon si kirurg në spitalin e Elbasanit (shef në pavionin e kirurgjisë). Në vitet e para krah Dr.Esad Kapshtica. Gjatë këtyre viteve ishte në shërbim  jo vetëm të pacientëve të Elbasanit, por dhe të Librazhdit e Gramshit. Përkushtimi, ndjenja e përgjegjësisë, diskrecioni e profesionalizmi  e kanë karakterizuar gjatë punës së përditshme. Duke qënë kirurg i përgjithshëm ka kryer nga të gjitha llojet e operacioneve si abdominale, traumatologjike të mesme e të rënda, renale etj.
Për disa vite kreu dhe funksionin e mjekut legalist (autopsitë).
  Ka marrë pjesë në Konferenca Shkencore e në disa Simpoziume të ndryshme. Ka botuar artikuj shkencorë në revistën “Shëndetësia Popullore”,Ylli” si dhe ka bërë një studim të thelluar për Kalkulozën Renale në 1971.
  Në vitin 1973 transferohet në Funar pas një ngjarjeje që kishte ndodhur në sallën e operacionit në një ditë kur ai ishte në Tiranë.
  Në vitin 1974 transferohet në Ambulancën e Kombinatit Metalurgjik ku punoi deri në  vitin 1999. Duke qenë tepër aktiv dhe i palodhur nuk e pranonte dot pensionin.
Gjatë gjithë karierës së tij ka qenë në shërbim të popullit të Elbasanit pa orar e pa ditë pushimi.   Të rralla ishin mbrëmjet kur ai qëndronte në shtëpi, pasi shkonte pothuajse çdo mbrëmje rreth orës 10.00 të vizitonte  pacientët që kishte operuar ditën. 
Doktor Kola njihte shumë mirë 8 gjuhë të huaja si Frëngjisht, Italisht, Gjermanisht, Serbisht, Bullgarisht, Rusisht, Latinisht, Greqishten e Vjetër dhe të Re; të cilat i përdorte gjatë gjithë kohës kryesisht duke lexuar. Ishte i apasionuar e me njohuri të thella në histori, gjeografi dhe letërsi. Në moshën 75 vjeçare filloi të mësojë turqisht.  
Me ardhjen e demokracisë u bë themelues dhe kryetar i Shoqatës Franco-Shqiptare për Elbasanin deri në vitin 2002 kur u tërhoq për arsye shëndetësore.
  U nda nga kjo jetë më 16 tetor 2003. Edhe në momentet që po largohej nga kjo jetë i vuri diagnozën vetes.
Thuhet se Dr. Polenës i pëlqente të operonte në krah të dhëndrit, të cilin e vlerësonte shumë, ndaj kur shkonte për pushime në Korçë i kalonte një pjesë në spital. Ata diskutonin bashkë dhe ngjanin më shumë si kolegë se sa dhëndër e vjehrr.
Kujtesa qytetare dhe shërbimet që i kanë bërë qytetit njerëz si doktor Kola, janë krenari qytetare për një qytet si Elbasani që njeh dhe vlerëson këto kontribute të rëndësishme në gjysmën e dytë të shekullit të njëzetë.