Sami Kokalari ( 1883-1943)

Sami Kokalari, i cili mbajti detyrën si Kryetar i Bashkisë Gjirokastër në fillim të viteve '30. Studimet e larta i kishte kryer për drejtësi në Turqi.
Gjatë kohës që drejtonte Bashkinë e Gjirokastrës u realizua shtatorja në bronx e heroit Cerçiz Topulli, e cila u përurua më 18 mars 1934, shoqëruar me një ceremoni madhështore. Sami Kokalari ishte në grupin nismëtar për realizimin e kësaj ideje, që u propozua së pari nga Xhevat Kallajxhiu dhe më vonë kryetar i këtij grupi, deri në përurimin veprës. Shtatorja u punua nga skulptori Odhise Paskali, me kontributin financiar të emigrantëve gjirokastritë në SHBA, u vendos në sheshin para Bashkisë së dikurshme dhe është nga të paktat gjëra që s'kanë ndryshuar që atëherë.
Sami Kokalari me familjen jetonte në shtëpinë që sot njihet zyrtarisht si "Muzeu etnografik", ose joformalisht si "shtëpia e Enver Hoxhës". Dy familjet Hoxha dhe Kokalari ndanin së bashku këtë shtëpi të trashëguar nga stërgjyshë të përbashkët. Ishte gruaja e Samiut, Fajkat Omari Kokalari, e cila u bë nxitëse për të lidhur në martesë vëllain e saj Bahriun me vajzën e madhe të Halil Hoxhës, Farien, motrën e diktatorit të ardhshëm.
Sami Kokalari ndroi jetë në maj 1943. EH e ka përmendur disa herë si personazh për t'u tallur në kujtimet e shkruara të vegjëlisë.
Dihet se si vazhdoi historia për Bahri Omarin, kunatin e Sami Kokalarit, i cili u dënua me vdekje në famëkeqin Gjyq Special.
Dhimbja për humbjen e vëllait ishte e madhe për Fajkatin, por do të rëndohej dhe shumëfishohej edhe më nga dhimbja për djemtë që ju dënuan me burgime të gjata, dhe veçanërisht për Ivziun që vdiq në burg.