Lec Shllaku (1921-2007)

Lec Shllaku u lind më 3 nëntor 1921 në qytetin e Shkodrës. Shkollën fillore e kreu në “Shkollën Fretnore” .dhe të mesmen në gjimnazin “Illyricum”, si kolegjial. Klasën e fundit dhe maturën e merr në shkollën “28 Nëntori”. Më pas përfundon shkëlqyeshëm institutin 2-vjeçar dhe studimet e larta në Universitetin e Tiranës në degën Gjuhë-Letërsi. Regjizurën e parë e gjejmë në dramën “Djer e Gjak” më 1945, më pas, ai punoi dy vjet në Tiranë në Teatrin Qëndror të Ushtrisë e më vonë si aktor në teatrin e Shkodrës, (Drama “Nën Okupacion më 1951), regjisor në Shkodër me formimin e Teatrit Profesionist, ku vuri në skenë dramat sipas viteve: “Njerëz me vullnet të mirë”, “Kopraci” më (1951), “Gjashtë Dashnorët”, “Në perëndim”, “Jeta fillon përsëri”, “Agimi”, më 1952, Ata u rritën në luftë”, “Familja e Alanit”, më 1953, “Kush është fajtori”, Toka Jonë , “Shtëpia buzë shkëmbit”, më 1954, “Shërbëtori i dy zotnive” dhe Autokritika” më 1955, “Kthimi”, “Tartufi”, “Shtërgata”, “Fejesë e ngatërresë”, “Krahët” më 1956, “Berberi I Seviljes”, “Engjëlli-Tirani i Padovës, “Nëna” më 1957, “Shtatë Shaljanët”, “Banuesit e shkallës nr 6” më 1958, “Binjakët Venecianë”, “Kunora e Nurijes” më 1959.

Në vitin 1962 emërohet në Elbasan, ku hapi dhe drejtoi teatrin profesionist “Skampa”. Aty qëndroi për 10 vjet. Vuri në skenë operetën “Vajza e portokallave” më 1962, dramat : “Rrethimi i Bardhë”, “Në Tufan”më 1963, “Shtatë Shaljanët”, “Linda”, më 1964, “Njeriu që pa vdekjen me sy”, “Trumbetjerja” më 1965, “Udha e gjatë”, më 1966, “I pesti u zu gjallë”, “Hijet ikin nga mallet”, “Udha e zavalinajve”, më 1967, “Firmat e vogla”, “Skënderbeu”, më 1968, “Qelia nr 7”, “Shqetësimet e Sokratit” më 1969, “Gadrat”, më 1970. Perveç skenës teatrore, ku dha ndihmesë si regjisor dhe dramaturg i dramës historike “Skëndërbeu”, Leci interpretoi në shumë filma artistike si tek “Skënderbeu”, “Para agimit”, “Plumba Perandorit”, “Ngadhënjim mbi vdekjen”, “Qortimet e vjeshtës”, “Larg barbarëve”, “Yjet e netëve të gjata” etj. Në veprimtarinë e tij la mjaft vepra, dorëshkrime, punime artistike, romane, tregime, novela, monografi, kujtime dhe artikuj gazetash dhe revistash.

Në pesë vitet e fundit të jetës botoi 7 libra, ndër të cilët librin me përshtypje udhëtimi : “Dy hapa në Perëndim”, i cili është botuar në italisht dhe greqisht. Për kontributin dhe vlerat që dha, Lec Shllakut i është akordua titulli “Artist i Popullit” dhe, së fundi, nga Bashkia e Elbasanit titulli “Qytetar Nderi”.

Plotësoi jetën artistike Fetah Biza, Elbasan, më 3 nëntor 2021.