Beqir Plangarica (1872-1924)

Lindi në Elbasan. Pasi mbaron shkollën qytetëse në gjuhën turke shkon për të vazhduar gjimnazin në Manastir. Pa mbaruar vitin e fundit shkon në Stamboll, ku regjistrohet në shkollën ushtarake të policisë. Emërohet në postin e nënkomisarit ne rajonin e Stambollit. B.P. vendos lidhje të ngushta me patriotët shqiptarë në Stamboll dhe kontribuonte në lëvizjen kombëtare. Më pas po me këtë detyrë transferohet në Ohër e në Manastir, ku fiton dhe gradën e kapitenit. E emëruan komisar në Elbasan, por për shkak të ndjenjave të tij nacionaliste nuk pranohet nga Prefektura, andaj po me këtë detyrë dërgohet në Ohër. Në këtë kohë B.P. kontribuon edhe në publicistikë: shkruan kronika, lajme, korrespondenca në gazetat shqiptare deri në Amerikë. Më 1905 dërgohet në Korçë ku bashkëpunoi me mytesarifin Fejzi Alizoti për çështjen kombëtare dhe shkollën shqipe, por qeveria turke e transferon prapë në Manastir, sepse e quante “nacionalist i fortë shqiptar”. Më vonë nga Manastiri transferohet në Kozan. Pas Hyrjetit 1908, B.P. kthehet në Elbasan ku bëhet ndër veprimtarët dhe drejtuesit e klubit “Bashkimi”. Kryengritja e 1912-tës e gjeti luftëtar aktiv me armë në dorë në malet e Martaneshit dhe në çetën e Bushekut “A vdekje, a liri”. Qeveria e Vlorës e emëron komisar të policisë shqiptare në Elbasan (1912-13). Më 1914 qe me forcat nacionaliste kundër rebelëve të H.Qamilit. Prej tyre arrestohet, burgoset dhe dënohet me vdekje, por i shpëton dënimit. Shërbeu si gjyqtar i paqit në Elbasan, duke kontribuar edhe në organizimin e mbarëvajtjen e “Odës së tregtisë”. Iu përkushtua edhe ndihmës dhe bamirësisë. I sëmurë nga tuberkulozi B.P. vdiq në Elbasan. Me rastin e 25-vjetorit të Pavarësisë, B.P u dekorua për kontribut të veçantë në lëvizjen kombëtare. Në gazetën “Ura e Shkuminif’ (shih) 12 prill 1924 në shkrimin “Beqir Plangarica vdiq” theksohej: “[...] Vdekja rrëmbeu një atdhetar të vlefshëm e të vjetër të qytetit tonë shokun tonë më të gnximshëm për çështjen kombëtare. Beqiri la një vend të zbrazët në rrethin e atdhetarëve të kthjellët të qytetit tonë”. (Ku.B.) 

Enciklopedia Elbasanit