Kisha e “Shën Triadhës“, Berat, Shek. XII-XIII

Kisha e "Shën Triadhës" gjendet në murin rrethues jugor të kalasë së Beratit. Kisha është e ndërtuar mbi një shkëmb guri dhe i përket stilit bizantin në formë kryqi të brendashkruar me kube oktagonale. Kisha përbëhet nga narteksi, naosi dhe mjedisi  i altarit. Narteksi ndriçohet nga tri dritare. Përmes një porte të harkuar nga narteksi kalon në naosin e kishës. Kisha e "Shën Triadhës" është e ndërtuar me gurë duke përfshirë brenda korniza tullash. Sipas Aleksandër Meksit përsa i përket arkitekturës bizantine kisha është një monument i arrirë. Nga një mbishkrim që gjendet mbi portën jugore të narteksit mësojmë se kisha është ndërtuar në kohën e sundimit të Andronikut II Paleolog (1282-1328). “U ndërtua prej themeli (ky tempull i Shën Triadhës) me kontributin dhe përpjekjen...e shenjtë të Zotit dhe mbretit tonë...bashkëshortes së tij Zonjës Irenë, në kohën e mbretërimit të Andronik Paleologut.... ”.

Menjëherë pas ndërtimit të kishës u pikturuan afresket, të cilat ruhen të dëmtuara. Në mesin e kubesë ruhen vetëm fragmente nga i "Gjithfuqishmi". Rreth tamburit të kubesë ruhen dymbëdhjetë figura profetësh, Danieli, Solomoni, Isaia, Davidi etj. Përmbi kolonën juglindore të kishës gjendet skena e "Ungjillëzimit të Hyjlindëses", ndërsa mbi faqen lindore të qemerit jugor gjendet skena "Lindja e Krishtit" me përmasa 2.10x1.55 metra. Mbi faqen e murit jugor, anash dritares gjendet skena "Ikja në Egjipt" dhe nën të gjendet skena "Larja e këmbëve të apostujve" me përmasa 1.98x1.28 metra. Pranë saj ruhet skena "Lutja në Gjetsemani" me përmasa 1.98x1.28 metra. Në faqen perëndimore të qemerit jugor ruhet skena e "Pagëzimit të Krishtit" me përmasa 2.10x1.55 metra. Në faqen jugore të qemerit perëndimor gjendet skena e "Shpërfytyrimit" me përmasa 2.10x1.40 metra, ndërsa në anën veriore të qemerit perëndimor ruhet skena "Ngjallja e Llazarit" me përmasa 2.10x1.40 metra.

  Mbi qemerin verior gjendet skena "Hyrja në Jerusalem" me përmasa 2.10x1.60 metra, ndërsa në anën jugore të qemerit lindor ruhet skena e "Darkës Mistike" me përmasa 2.10x1.80 metra. Nën të gjendet skena e "Shestjes" me përmasa 2.40x1.80 metra. Mbi faqen e murit verior gjendet skena "Zbritja nga kryqi" me përmasa 2.63x1.63 metra, ndërsa në anën veriore të qemerit lindur ruhet skena e "Ngjalljes" me përmasa 2.40x1.80 metra.

Në apsidë gjendet "Platitera me Emanuelin ndër duar", ndërsa në brezin nën të gjendet skena "Kungimi i apostujve" me gjerësi 1.35 metra. Në nikën jugore të kungës gjendet një ndër dhjakonët martirë, ndërsa në harkun që lidh kolonën veriperëndimore me murin verior gjendet në gjysëmfigurë "Shën Nestori". Në harkun që lidh kolonën me murin perëndimir gjendet në gjysmëfigurë "Shën Gejrgji", ndërsa në anën e djathtë të portës perëndimore gjendet skena "Ava Zosima duke kunguar Marinë Egjiptiane". Afresket e kishës së "Shën Triadhës" në kalanë e Beratit i përkasin stilit të rilindjes së artit bizantin[1]. Kisha e "Shën Triadhës" është shpallur monument kulture[2] në vitin 1948.