Kisha e “Shën Mitrit“ Bezmisht, Prespa e Madhe, Shek. XIV

Kisha e "Shën Mitrit" gjendet në fshatin Bezmisht të Prespës së Madhe. Kisha është njënefëshe, me apsidë trifaqëshe dhe mendohet të jetë ndërtuar gjatë shekullit XIV. Apsida e kishës është me punime dekorative me një brez prej dy rreshta tullash të vendosura horizontalisht si dhe me nga një tullë në formë medalioni në mes dy faqeve anësore. Tryeza e shenjtë është e lidhur në murin e apsidës. Muratura e kishës është ndërtuar me teknikën e kluasonazhit me dy tulla vertikale ndërmjet gurëve dhe dy radhë tullash horizontale[1].

Kisha është e pikturuar me afreske vetëm në faqen e murit lindor. Në nikën e vogël mbi portën perëndimore jashtë gjendet skena e Shën Mitrit. Në apsidën e kishës gjendet "Platitera" e tipit Oranta, e cila paraqitet me duart e hapura në pozicion lutjeje, por pa Emanuelin në kraharor. Nën të vjen brezi me hierarkët e kishës: Vasili i Madh, Kirili i Aleksandrisë, Joan Gojarti dhe një hierark i paidentifikuar. Në nikën e prothesit gjendet Shën Stefani dhe majtas tij një skenë e paidentifikuar. Në nikën jugore gjendet Romano Melodiozi. Anash apsidës gjendet skena e "Ungjillëzimit", ndërsa në nikën mbi portën perëndimore gjendet skena e "Shën Mitrit mbi kalë duke vrarë Lineun"[2]. Në nikën e prothesit  gjendet një mbishkrim në gjuhën sllave me shkronja cirilike: “Prano o zot lutjen e shërbëtorit tënd, zotit Dragan me shoqërinë”[3].