Kisha e “Shën Thanasit” Llëngë, Pogradec, Viti 1694

          Kisha e "Shën Thanasit" gjendet në fshatin Llëngë të Pogradecit. Kisha ka përmasa 12x8.25 metra dhe është bazilikë njënefëshe me tri apsida anash. Ikonat e kishës së "Shën Thanasit" janë pikturuar nga Kostandin Shpataraku. Mbi ikonën e madhe të Krishtit në ikonostasin e kishës gjendet mbishkrimi: Χείρ Κωνσταντίνου ίερομονάχου καί διά σηνδρωμή(σ) καί πόθου / Νικολάου ίερεος...ικονόμου...Χ(ριστο)ύ αχyδ (1694). “Dora e jeromonak Kostandinit me kontributin dhe dëshirën e prift Nikollës...ekonomit. Prej Krishtit 1694” [1] .

Gjithashtu sipas Theofan Popës, Kostandin Shpataraku ka nënshkruar edhe katër ikonat e tjera të mëdha të ikonostasit të kishës: ikonën e Shën Mërisë, ikonën e Joan Pagëzorit, ikonën e Shën Thanasit që është edhe shenjti i kishës, si dhe ikonën e Shën Mitrit. Në faqen e përparme të proskinitarit të kishës së Shën Thanasit gjendet i gdhendur viti 1717. Proskinitari është prej druri të gdhendur rreth 1.50 metra i lartë [2] .

Kisha e "Shën Thanasit" është rindërtuar në vitin 1752. Mbi portën perëndimore brenda kishës gjendet mbishkrimi përkatës: Ανεγερθη και ανεστορηθη ο θηος κ(αί) πανσεπτος ναος του εν αγιης πατρος ημον Αθανασηου του Μεγαλου Πατρηαρχου Αλεξανδρηας / δηα σηνδρομη(τού) κ(αί) υκονομου Νικολαου ηερεος κ(αί) γεροντον Κηρ Δημητρι και ετερος κηρ / Λαζαρου κ(αί) ετερος Γεργι Κηρ Κυονα, κόπου κ(αί)εξόδου παντον τον χριστιανον, ηερουργουντων Γεωργιου ηερεα μιχαηλ ηερεος Λ / αζαρ(ου) δε Γεοργιος, Ποστολη, Κοστα, ταννο, Νικο, Κοστα, τηνα, Αρχηερατεβοντος κυρύου κυρύου Αρσενήου / Βακο. Δηα χηρος καμου ζογράφου ταπηνός Δημητριος ηος Νηκόλαου Ζογραφου ε(κ) κομης χορ(ας) Ληνοτοπη, ηπερετοντον Ζονοβι(ας) μοναχι(σ). “U ngrit dhe u pikturua ky tempull hyjnor dhe i gjithnderuar i atit tonë ndër shenjtorët, Athanasit të Madh, patrikut të Aleksandrisë, me kontributin dhe të ekonomit prift Nikollës dhe të pleqve zotit Dhimitër, zotit Nikolla, zotit Llazar dhe zotit Kiona, me përpjekjet dhe shpenzimet e të gjithë të krishterëve, të priftërinjve që kryejnë shërbesat e hirshme, prift Gjergjit, prift Mihalit dhe Llazarit, Gjergjit, Postolit, Kostës, Janos, Nikos, Kostës, Tinos. Në kohën e peshkopatit, të peshkopit zotit Arsen Vako [3] . Me dorën time, të piktorit të përvuajtur Dhimitrit, birit të Nikollë Zografit, nga katundi Linotopi, që i shërbeu murgεshës Zinovia” [4] .

Mjeshtër Sotir Tima ka punuar kryqin prej argjendi, i cili përdorej gjatë pagëzimit. Rreth bazamentit të kryqit shkruhet: Τουτο το σταβρου υπαρχι της μονης του αγιου Αθανασιου της πολη-τιας χορα Λανγκα Μαστορας Σοτηρι Τημα. “Ky kryq është i manastirit të shën Thanasit, të qytetit Lunge (Llëngë). Mjeshtër Sotir Tima” [5] . Kjo kishë është prishur gjatë luftës Italo-Greke. Vite më vonë në truallin e kishës është ndërtuar shkolla e fshatit Llëngë.