Kisha “Ungjillëzimit” Vithkuq, Shek. XVII

Kisha e Ungjillëzimit gjendet në fshatin Vithkuq të Korçës. Naosi i kishës është njënefësh me përmasa të brendshme 8.0x5.0 metra. Muratura e kishës përbëhet nga gurë gëlqerorë dhe çmërsi, të përforcuar me breza druri. Çatia e kishës është me rrasa guri. Apsida është e punuar me blloqe të rregullt me gur çmërsi dhe e zbukuruar me nike të harkuara. Mbi apsidë gjendet një nike, e cila mbante ikonën e Ungjillëzimit të Hyjlindëses [1] .

Një mbishkrim mbi ballinën e pikturuar të kishës tregon kohën dhe ktitoren e pikturimit të skenës "Gjyqi i fundit": Δέησις υην / δούλην του / Θ(εο)ύ Ιωά(ν)α μο/ναχί εν μηνι έτούς ηουνιο στ α χ y στ (=1696). “Lutje e shërbëtores së perëndisë, murgeshës Joana, viti 1696, në muajin qershor 6”. Skena "Gjyqi i fundit" duhet të jetë pak më e vonë se koha e ndërtimit të kishës. Duke u nisur nga ky fakt, mund të hamendësojmë se kisha i përket gjysmës së dytë të shek. XVI [2] .

Ikonat e ikonostasit të kishës janë pikturuar nga i njëjti piktor. Mbi derën e bukur të ikonostasit të kishës gjendet ky mbishkrim: Δευσυς κε τον δουλον Θανη Κυνη ετους Α Χ Π Δ (=1684). “Lutje e shërbëtorit të Perëndisë, Tani Kini, 1684” [3] . Ndërsa mbi ikonën e Shën Mërisë në ikonostas është shkruar: Επη ετους απο τις ενσαρκου ηκονομηας Ιυσου Χριστου Α Χ Π Ε (=1685). “Në vitin prej ekonomisë së mishërueme të Jisu Krishtit, 1685” [4] . Mbi ikonën e Joan Pagëzorit në ikonostasin e kishës kemi këtë mbishkrim: Δυα χυρος .....δασκαλος Κονσταντινου. “me dorën .... e mësues Kostandinit” [5] .