Kisha “Burimi Jetëdhënës” Derviçan, Gjirokastër, Shek. XVII

Kisha “Burimi Jetëdhënës” është mbi fshatin Derviçan. Mendohet se është ndërtuar në shekullin XVII. Kisha përbëhet nga naosi dhe narteksi. Naosi është në formë kryqi me kupolë. Ka përmasa të brendshme 6.85x3.80 metra. Kupola, që mbulon bërthamën qendrore të kishës, ngrihet mbi një tambur të ulët. Kisha është e mbuluar me çati dyujëse. Mjedisi i altarit ndahet nga pjesa tjetër me një ikonostas druri të gdhendur. Në altar, krahas apsidës së bemës, janë edhe niket për protezisin dhe diakonikonin. Në apsidën jugore dhe atë veriore ka dritare të vogla për ndriçimin e naosit. Në muret veriore dhe jugore ka dritare të mëdha për ndriçimin e narteksit. Hyrja për në narteks bëhet në anën perëndimore. Kisha ka tri apsida, të cilat janë të zbukuruara me elemente dekorative, me nike të mbuluara me harqe të shkallëzuara, si edhe me korniza në formë dhëmbësh sharre [1] .

Mbi skenën “Burimi Jetëdhënës” është shkruar: 1825 ιουνιος 23. Δηά σηνδρομής τού αίδεσιμοτάτου παπά κυρτζή μετά τού ήού καί πρεσβητέρας αύτου εύχεστε καί σηχορήτε ή θεορούντες δηά τού κυρήου: καί διά (χει)ρός ήμόν πέτρου ίερέος έκ βλαχογοραντζις. “1825 qershor 23. Me kontributin e të shumënderuarit Papa Qirixhiut me të birin dhe priftëreshën e tij. Ju që vështroni, lutuni dhe faleni atë. Me dorën tonë të priftit Petros nga Vlahogoranxia” [2] .